حنيني إليگ إغتراب، وغُربتي بِگ موت !

«  مريضةٌ بالحياة ، مريضةٌ بفظاعة ما يدور ، ولو أدخلوني غرفة أشعّة والتقطوا صورة لصدري لوجدوا فيه وطنا يبكي. « – غادة السمان

هكذا كتبت غادة، كم هي مؤثرة و عميقة هذه العبارة، مريضة بالحياة، ماذا يعني أن نمرض؟ هل نعي بما هي أرواحنا مرهقة و تتخبط في داخلنا؟
غادة السمان كانت تقصد الحياة التي دارت حولها من حروب و برك دماء تسيل و دموع قد جفت.. و احلام قد دفنت تحت الأنقاض..
اما نحن، فما هي الحياة التي أمرضتنا يا ترى ؟
هل ما يدور حولنا من بشاعة القلوب، أم ما نجابهه من سواد الارواح و لؤم الأقوال.. ؟
هل ما يفعله بنا العالم لتشويه احلامنا البسيطة، أم ضعف إرادتنا أمام هذا الكم من الشرور المحيط بنا؟
ها نحن نعايش السلام و الأمن المزعم، و لكننا أيضا نشعر ب وطن يبكي بداخلنا..
وطن قد فقد قيمه، أصوله و جذوره العتيقة.. لكل منا وطن أصبح طريح المستوطنات، لا يعلم أين أرضه الأم..
الأرض الأم، هي تلگ التي عشت فيها طفولتگ و انفعالاتگ الأولى و أول حزن قد مررت به، و أول سعادة عارمة غمرتك، و أول حب قد ترعرع داخل قلبك الأخضر، تلگ الأرض التي نشأت بها روحگ العذراء الأولى ..
ثم سُرقت منگ في غفلة منك، لا تعلم متى.. و لكنگ بعد مرور زمني محدد، استيقظت و وجدت نفسگ في وطن آخر.. و أحسست بـ مرضگ بالحياة، و أنت تعايش طقوسًا و تتبع تيارات جارفة تسلبگ روحگ و كل ما تملك دون رحمة..
أظن أن هذا أسوأ ما يمر به الإنسان ، أسوأ من الحروب حتى..
فالحرب تخلق بداخلگ حرب الهوية، و إرادة افتكاك ما هو لگ و بصلة تامة و وطيدة بروحگ و قلبگ و دمگ.. و لكن ما نعيشه اليوم.. حنين إلى وطن لا نعلمه أين، و اغتراب سيقتلنا يومًا ما دون شك..

#رحمة_عمار

عن الجزء المظلم من العالم أتحدث..

لطالما كانت جلّ كتاباتي، تكسوها غيمة من الحزن، بعثرة من اليأس.. قد أسقيها أحيانا جرعة أمل بسيطة إلا أنها لا تروي كمية الجفاف في هذه الأرض.. لكنّ الأعشاب الجافة، النباتات الطفيلية أبت الانقراض، لم تترك سبلا لأي شجرة مباركة أن تزهر و تثمر في هذا القلب المتعب..

لا أعلم حقًّا ما هو سبب تعبه المستمر، ما هو سبب أزماته المتكررة. قد أكون أنا من أقود بنفسي إلى المتاعب في كل مرّة أتوق لعيش قصص أعلم جيدًا نهايتها منذ البداية..

ربمّا فرط ثقتي في أنني أملك قلبًا صامدًا أمام ضربات الحياة. أثق بأن شخصيتي التي تهتز و تنتفض كثيرًا ستكون حديدية في مواجهة الصعاب.. قمت بإيذاء نفسي من فرط الثقة!

كلما كانت الأشياء أمامي تتعقّد و تتشابك كنت أنا في ذروة التركيز، في ثقة تامة أنني سأحل الأمر، سأتجاوز هذه المحنة أيضا.. فقد مررت بالكثير..

مررت بما هو أصعب و أكثر إيلاما، لكننّا لا نعلم أننا إثر كل انتكاسة طاقة التحمل تصبح أقل مما كانت عليه .. مردود المقاومة بات منخفضًا، لم نعد نتحمل صعود جبال من الهموم، و تكبّل وابل من النفاق البشري المقرف، لم نعد نقدر أن نعيش « أسوياء » وفق قانون البشر على الكوكب.. الحياة هنا صعبة جدًا..

نتشبث بالحياة و نجادل لنعيش كل يوم،

نحارب كي ندرس ما نحب.

نحارب لإقتناء كتاب ممنوع من دخول وطنك!

نحارب من أجل حياة مسالمة، لا يغزوها النقد و التنمر.

نحارب كي نأخذ استحقاق العيش الحرّ!

ولد الإنسان في هذا العالم حرًّا طليقًا، فلماذا تصرُون في رسم الحدود و الممنوعات الواهية، تلحون دائما، لماذا؟..

لقد ملل العالم هذا العيش المبرمج وفق قواعد اعتباطية، و مفرقات اجتماعية لا تمت بصلة للعرف أو الدين، مللت الطبيعة هذا الظلم الجائر و مللنا نحن.. فكفى عبثا بذوات الأرواح..

لقد ازدحمنا بما يكفي، فليحضى كل انسان باستقلالية فيما يفعل و فيما يعايش.. دعونا نخطئ ، دعونا ندفع هذه الفواتير الثمينة التي لطالما حدثتمونا عنها.. دعونا و شأننا..

عن الجزء المظلم من العالم أتحدث.

#رحمة_عمار

الحرف اللي يوصل طرف لسانك و يرجع كيف الشهقة ..

الكلمة الي تكتبها و تفسخها ..
ايدك الي ترعش.. دموعك هابطه ف سكات ..

سما اللي تعنقك و الهوا الي ينشفلك اك العوينات الذابله..

سرحة اللي تهزك في وسط الزحمه ..
الضبابة الي تغم على عينيك مغير سبب ..
الشمس الي كانت، تولي فجأة غيم.. و المطر ما فماش!
الحيوط الي هزت منك اسرارك و كيف تتعدا ادور وجهك، متحبش تتفكر ..!
الثنايا و الاقواس، الزنقة و الفلة الي كلهم يعرفو حكايتك.. يعرفو قلبك باش قاعد يفيض ..
كان انت متحبش تشوف !
صوتك و دنيتك الي ترسمها، تتخيلها، تحلم فيها.. كيف تحل عينك تلقاها هربت منك ..
الريح و النسمة الي تهز رمشة و تحط أخرى .. شمس تغيب و تطلع.. و انت ماكش ترا في شمسك وين …
ايدين اللي تمدّت و قصيتها، و كلام الي تقال و محبيتش تسمعو ..

هاكم سرّك، تحكيهم ب تحويقة عينيك، و ب تبسيمتك الصفراء.. تحكيهم و انت واقف عالجمر وسط الناس تحب تهرب تقعد وحدك.. تحكيهم وانت تتنهد بلا ما تحس.. تحكيهم كل لحظه و كل دقيقه.. اما حتى حد، ما فايق بيك، حتى حد ما ينجم يفهمك فاش تعيش ؛

” رشمـــة “

اغلب حكايات اللي في حياتنا، كيف توفى خاصة نحسوها الكل كيف بعضها..
كان خسرت صحاب، فارقت عبد عزيز، خسرت ناس كان تعنيلك الدنيا.. اي وجيعه ف الحياة..
كانت تظهرلنا ف وقت ما سكينة مغروسة ف قلوبنا، و تحس بدقة قلبك مش منظمه.. شاهية مقطوعه و بينك و بين روحك
متأكد! اللي حتى حد ما تعدى بلي قاعد تعيش فيه، اللي وجيعتك يفيض بيها العالم و اكثر و حتى حد ما ينجم يفهمك.
لكن بعد مدْة من : الإدراك ..
كل حاجه تشد بلاصتها.. امور تتنظم بالشوية.. حتى نارك تبدا تهتف مره بعد مره.. بحر هايج الي فيك تبدا موجتو تركح و نرجعو لـ روتين الحياة..
تنجم تكون تبدلت و تكسرت فيك حاجات و تغيرت..
كيما ازين قطعه ف الدار عزيزة عليك و ديما خايف عليها و طاحت تكسرت، قعدت تغزرلها مبهم و حاير منجمتش ترجعها كيما كانت.. صبرت صبرت و بعد هانت عليك و لوحتـــها.
من بعد باش تولي حكايات الكل pareil ما تزيد شي عليك و انت ما تزيد عليها ب شي.. كان بالصبر ممكن!
باش تفهم مسببات، علاش عشتها حكاية هاكي..
علاه انا ما نجحتش ف قرايتي..
علاه انا ما تقبلتش في الخدمه كذا..
و علاه صارتلي اك فازه مع عرفي..
كيفاه غششت مني امي..
علاه حب حياتي تخلى عليا..
علاش داري تسرقت..
علاه ولدي ميحبش يقرا..
..
باش نبداو نفهمو شنوا كان داير بينا.. شنوا عشنا بالضبط حتى وصلنا للنقطه ‘توا حاليا’
و في وقت هكا بعد ما تعديت بقداه من عثرة، قداه من طيحة.
لازمك تعمل ، لا ما تعملش! لازمك تخلق

 » رشمة  »
رشمة ليلك توا ف لحظة هاذي تطرزها و ترسمها و تبدا منها من جديد بعد ما مريت بـ هالمراحل الكل..
ما نوعدكش تكون احسن ملي كنت فيه اما اكيد باش تكون مرتاح اكثر..
شوف احنا بطبعنا نخافو نواجهو حقيقتنا ديما حتى كان نبداو واعين بيها.. اما بعد لحظة مواجهة، بعد ما نفهمو فاش نعيشو.. بعد ما عرفنا اش عنا و اش علينا..
بعد ما فهمت انت الي تقرا، شنوا تحب من الدنيا هاذي.. لازمك تكبش و ما تسلمش بالساهل..
تفضل، قوم و اخرج و ابدا على روحك..
هاذي رشمتك ، هاذي دنيتك ، و هاذي حياتك..
لونها و ارسمها و عيشها كيما تحب و اكثر، نهارت الي يغلب عليها اللون الاكحل..
اتفكر اللي اللون الابيض ديما موجود. حي فينا ما يموتش.
#رحمة_عمار

ڨلب معلڨ بين النجوم..

في ليله من ليالي، ڨمرة تضوي، و نجوم تلمع..
و انت ساهر، سارح، تغزر لنجومك الهاربة تعد فيهم،
نسمة معدية هازة روحك و ماشية،
جواجيك تلهب و قلبك محروق، اما وجهك بارد و عينيك..
عينيك معرفوش يعبرو ،
قعدت هكاك، تحكي مع روحك.. لا نوم يهنيك و لا بلاصة تهديك، لا حضن يحن عليك و لا كتف يقلك ايجا عليا اسند راسك..
قعدت كي الشجرة المتروكة لا سقاها حد و لا رحمها ربي بـ مطرة تبرد عطشها..
لا نجمت تقول انا غالط، و لا تلوم و تقول علاش..
عايش خوضه كبيرة، تفرعيسة موش مفهومة..
باقي نجمة تلمع و ڨمرة غلبت الغيوم و انا؟
انا مغلوب و غلبتي غلبة، انا قمر دنيتي و شمسها مسلوبين..
انا روح بين نارين، انا شمعه لا نجمت تعاود تشعل و لا ذابت و فتيلها طفى..
انا تخلويضة ضايعه، ملقاتش بلاصتها.. مش عارفه وين نحط روحي..
بحذا الي عاشو و توجعو، ولا مع اللي ما عاشو شي و تسرقت دنيتهم..
باقي نجوم مطفاوش.. الصباح ناوي يبطى باش يصبح، عارفها ليلة موش ساهلة، مش بالساهل تتعدا..
#رحمة_عمار

القَدَر ؛

القدر، كلمة نقولوها في برشا مواقف في حياتنا..
الحاجه الي نؤمنو بيها ايمان قطعي و عمرنا ما فهمناها..
القدر الي في كل مره يفاجئك و وقت ترا دنيا واضحه يفشلك.. و وقت تقول وفات يقلك لا و يعوضك..
حاجات متناقضة ، صدف غريبه، و فلاش وراه فلاش..
المخ يحبس ، المنطق يجبد روحو، مسكين ديما منهزم أمام القدر..
حرب ادور في مخك، و انت قاعد تتفرج، كيما اك العبد الي يقعد على كرسي في حافة الطريق ما معبرو حد و يتأمل في الفراغ في الماشي ووجاي، ما فاهم شي..

ساعات نقول علاش انا هكا يصير معايا، لكن في الحقيقة القدر معندوش ذنب، احنا نعملو الحاجات بايدينا و باش نصبرو رواحنا نرميو لوم على اي حاجه..

و من بعد ادور دنيا و تعيشك مواقف غريبه متعرفش كيفاش تتصرف، تتساءل و توا ذنب شكون، شنوا لازمني نخمم و نتصرف؛ شنيه هاللغز الي محبش يتحل..

وقت لازمني نبكي نتبسم، وقت الضحكه من القلب لازم نخرّج كان ربعها اكهو، و وقت لازمني نحب و نتحب نمشي، و وقت لازمني نفارق نعفس على قلبي و نبقى..
ساعات نسأل روحي شنوا عشت، ما فهمتش حبيتك، عشقتك، ولا حتى واحده فيهم
انا كنت ولا عمري ما تعدا خيالي في حياتك..
منيش عارفه نحس ولا خاوية من المشاعر..
نتوحش ولا نحن، تعودت ولا نتوهم..
موجوده في النفس القصير لي تتنفسو ولا شطبتني عندك مده..
تتفكر غزرتي و ضحكتي ولا تفاصيل معندهاش قيمه..
قعد كلامي يرن في وذنك كيما كلامك..
قعدت مني حاجه زعمه باش ادور و تناديني نجي ناخذ منك حاجه تخصني..
تتفكرني بالخير و لا بالشر، ولا منخطرش عالبال حتى بالصدفه..
موش فاهمة، كيفاه بديت كل شي و في لحظه حتى شي.. قداش دنيتنا غريبه يا راجل..
قداش انا وياك كيما المحيط و البركان منتلاقاوش و زوز ساكنين منعرفوش متين واحد منا ينفجر.. ولا بالك انا غالطه..
صدقني هاذي أقوى درجات الشك و توهان الي وصلتلها.. و اي حيره و خوضه تتعاش.. تقعد ب trace متعها فينا، لا وقت ينسي، و لا دهر يداوي، و لا الصبر يطفي النار.. قلوبنا تتحرق و رمادها يعاود يشعل وحدو ؛

وكلمة القدر هي الي تنقصلنا من خوماضه لي في ادور في عقلنا ، القدر مصدر للحيره باش وقت حياتك تاقف، يخليلك التخمام و الأسئلة باش عجلة حياتك ادور و تقدم حتى لو كان بشويه، يخليك تتمنى الصدف و ما تجيش، و ساعات تتمنى كان الهدوء و ما تنعمش بيه..
تعيش حرب مع الدنيا ما تفهمهااش، تحس روحك انك قاعد تجادل في الحياة باش تعيش.. و اغلب الاحيان،
تحس الي حياة تعطيك نفس الكف مره اخرى تحب تقلك راك ما تعلمتش من الكف لولاني فيق على رووحك.. و كيما قالت الغنايه : لفي بينا يا دنيا 💔
#رحمة_عمار

الواحد لا عرفها لا منين تبدا لا منين توفى.. ؛ (3)

تعرف، حسّك مازال موجود..
لا، خيالك مازال يدور معايا..
لا, لا هاذي لا هاذي، روحك الي رسمتها انا في خيالي ادوور معايا..
اك ضحكه من القلب، و الروح المزيانه، القلب الصافي الحنين،
و الغش على اقل حاجه،
و حاجات منظمه فووق لازم،
رونق و عيشه، دنيا و حلمه،
طموح و غزره لبعيد، موزيكا و جو،
كتب مقطعه من الاجناب و صليحه تغني من غادي..
ريحة قهيوة عربي و تبسيمه مقابلتني و ايد تلعبلي ب شعري..
انا هكاكا خايبه، نحب حاجات على كيفي تتسطر و تمشي، نحب كماليات برغم نعرف الكمال لله سبحانو اما ما بالطبع لا يتغير، و حببتك مودال في مخي انت ما جيتش قدو،
لا انا جيت كيما تحب في خيالك و لا انت زادا..
قعدنا زوز مهمشين، بين حاجه الي نحبو نراوها و بين حاجه موجوده بلحق وكل واحد مازال مصدق حلمتو و ماشي فيها..
لين لقينا رواحنا في وقت فيبالنا الي احنا قراب، احنا في اصل بعاد.. و كل واحد مهوس بزوز عباد في الاصل، شطر حقيقي معاشرو و شطر موش موجود يتخيل فيه..
في وقت كيما هكا بصراحة و منعرش كان حد عاش هالموقف مره من المرات، تحس مشاعرك… معندكش مشاعر!
كل شي بنيتو دخل فيه الشك، ثيقتك في روحك تهتز و تصويرة العبد ا لي قدامك بطبيعتها flou

و ما تفهمش لحكاية كيفاش بدات و لا كيفاش وفات.. و لا نقلك ظاهرلي وفات قبل لا تبدا !
تحس من داخل عندك كوره جامده اسمها ‘قلبي’ و حاجه متفهمهاش انا علاه عشت هالحكايه و وين حبيت نوصل و دوامة متاع أسئلة ادور..
اما ترجع تستغرب من البرود الي انت فيه، من اللامبالاة الي فجأة سيطرت عليك بعد ما كنت تحكي على حاجه و مسميها ‘حلمه’..
الحكاية ببساطة انو بعد ما تتعلق بحاحه في حياتك و تبدا تتشعبط في اذيالها باش توصل تهز عينك تلقا مافماش وين توصل اصلا، ايديك تبرد عليها كيما نقولو، اك شعلة الحماس الي فيك تطفى، و اك حلمه تفيق منها، و في جمله أخرى
« ها قد صارت الحقيقة سرابًا ، و ما كانوا حقيقتگ الوحيدة، أصبحوا اليوم وهمگ العظيم. »
احنا هكاكا، هاكي كلمه الي ديما نقولها كي نواجه تناقضات متاع روحي و منعرش نفسرها، احنا هكاكا متطلبين و منفهموش شنوا يرضينا كان بعد وقت من الإدراك، و ساعات نبداو مدركين و نحبذو اننا نواصلو في رحلة البحث على رواحنا الضايعه..
سبق و قلت ديما كيف نوحلو لازم نتبعو صوتنا الدخلاني الي عادة ميخونكش و يصدق ديما، المره هاذي الصوت دخلاني خانس و ساكت ههه
هو بيدو موش فاهم فاش يعيش، قاعد يعاود في نفس الحاجات، في نفس تاريخ، في نفس النهار و في نفس الطقوس، ياخي دخل بعضو..
عباره واحد كان ماشي للجبل و متصور باش يلقى فيه مناطر تسحر العينين على علو قداش من ميترو، هوا و نسمه تهبل تشرح القلب، و ثلج متاع هالوقت و كذا، ياخي مشا للجبل لقاه صحراء و شمس تحرق و دنيا ريح و عجاج.. لنا ما عندك حتى حل، لا مخرج لگ من هذا!
كان انك تفسخ الحلمه و تعاودها، انتي باش تعيش هكا هكا، و ما فيها باس نعاودو نعيشو الحاجات مره اخرى بعد ما عشناها ب منظور اخر و ب نفس الحلمه اما فيها روتوش، لازمك تعاود الفيلم باش تلقا بلاصتك، عمرك ما تقول هنا وفات، و هوني حياتي تاقف، المره هاذي باش تمشكي الكارطه و تزهر معاك، و بعد ما كانت في خيالك مرسومه باش تولي حقيقة مضمونه.. موش الفايده في لحكايه و في الاشخاص، الفايده تكون روحك معاك، و متعرش عليها رااهوو لا منين تبدا و لا منين توفى..
#رحمة_عمار

‘كن شمسًا و لا تكن ظلاًّ’ ☀️💛

لحكايات في حياتنا نحسوها تشبه لبعضها اما ما فما حتى حكايه تشبه لاختها، و ما فما حد يعيش نفس حكاية انسان اخر..
اي قصة و اي موقف يتعاش، هو ليك انت، و لشخصك انت و لروحك ترسم انو يتعاش،

كل حاجه عندها سبب حتى كان تو متعرفش علاش اما باش يجي وقت و تعرف..
متخممش عااد ياسر في أسباب و تسرح و تنسا انك نعيش…
خليك على طبيعتك، عيش الحاجات كيما يقلك مخك و كيما ترتاح فيها، بالباهي و الخايب الي فيها
المهم حط روحك في قايمة الاولويات و الباقي تو نتصرفوو فيه..
متخليش مشاعرك هاينه بيك، و وقتك عادي يضيع منك
و تضيع مصلحتك على حساب غيرك، و عادي حزني انا على حساب سعادة غيري.. لا!
حتى انت تستحق تعيش فرحان، خليك قوي واثق من روحك انك تنجم تعملهم زوز راحتك و راحة الي دايرين بيك..
اتفكر ديما اللي
روحك الي تتعب من كلمة متقالتش، و من فازة انت عديتها اك نهار و من تتليفه متاع البارح و و.. من بعد ما يداويها شي،

و الوقت الي يضيع في تخمام بلا فايده، و بكا و حيره متوفاش.. معادش باش يرجع بعد باش تتحسر عليه و وجيعتك تكون اكبر!

الفرص الي اطيرك و تحققلك احلامك و ضحيت بيها خاطر عباد موش مستعده تضحي على خاطرك باش تبقالك غصه متنجمش تتجاوزها، باش تقعد غمامة حزينه في عينيك اتبعك..

الخرجه الي فلتها عام الي فات و الضحكه الي تسرقت مني و الف حاجه و حاجه لازم يعطيوك قلب جديد تعيش بيه الي مازال و تعوض الي فات..
ابدا عامك الجديد بقلب كبير، يحب يعيش بلحق، يعرف معنى الحياة بالرسمي، لا نقصد يعرف يعيش منغير ما يعذب روحو..

تعيش يعني انك تتمرمد و انت étudiant و مصروفك على قدو و تجري صباح و ليل اما شايخ خاطر في اخر لعشيه تتلم مع صحابك الي تحبهم تعمل ضحكه و جوو

تعيش يعني انا نحب طفله و هي ما فيبالهاش تي لا عندها شكون اما كي تتعدا كل صباح تقلي بنجور يتعدا نهاري مزيان..

تعيش يعني تتشارك الحاجات و الانشطه الي تحب تعملها مهما كانت مهمه بالنسبه ليك و تافهة يمكن في عنين غيرك

تعيش يعني تمشي تخدم 6 متاع صباح دنيا ظلمه في شتا و بارده و ناقص نووم اما تقول والله في بيرو ثما شميسه هايله من بعد نعمل قهيوه سخونه و يبدا نهاري..

تعيش و انت حارم روحك من الف حاجه اما في ليل تغزر ل اك ڨديس فلوس صغرون الي تلم فيه و فرحان تقول تو نسافر به، تو نشري بيه كادو لامي في عيد ميلادها، تو نعطيه ل بابا حق الدوا..

تعيش نهار عصب و ستراس و déplacement و عياط من عرفك اما كي تتفكر ضحكة بنتك الصغيره و تعنيقتها ليك في دار تنسا التعب الكل..

تعيش يعني نكلم امي في تليفون كل صباح باش اك دعيوة الخير نستفتح بيها نهاري و نفرح كي نتعدا للكوشه نلقا مازال فما خبز سخون..

تعيش يعني ما فيها باس ساعات تعمل فصعه و تغيب على خدمتك ولا قرايتك ترتح اعصابك تمشي حتى تلعب كيف صغار، تمشي تكامبي في بلاصه ولا اي حكايه تخطرلك..

تعيش يعني رغم بلاد داخله في حيط و اورو باش يبدا ب 6 دينارات اما انت مفقدتش الأمل و تقول ربي ما يخليهاش ب عبادو و مادامني نسعى اكيد باش نوصل..

تعيش و تجرب و كان هاذي ما مشاتش عادي اصلا كان ما نخسرش منعملشي ڨليب…

الي نحب نوصلوو، الي بلحق رانا قاعدين نعيشو اما نحبو نقتلو رواحنا بالسيف ، ركزو في حاجات ايجابية الي في حياتكم يزيو من تجويح، اضحك و خلي روحك تعيش، عبر و اتكلم و كون حر راك انسان،
متسلموش في ماهيتكم الانسانية، متخليوش الحاجات السطحيه متاع دنيا تقتل فيكم انسانيتكم، كونوا عقل حكيم و روح و قلب يدق و جسد يعيش و كونوا احرار، موش لازم نقلع جذوري و تقاليدي باش نكون حر

يكفي تكون عندك هدف تو حريتك هي الي ترسملك الطريق..

كون انسان تونسي متشبع ب هواها و ب قيمها و ب كرم ناسها، تحب بلادك و تحب الخير ليك و ليها، اعرف روحك شنوا تحب ارسم هدف و طموح و حريتك و قوة ارادتك هي الي ادلك عالطريق..
ابداو عامكم ب نفس جديد و ب روح مبادرة كبيره، ابنيوا رواحكم مادام ربي عطاكم العمر و الوقت، متخسروش السنين هدر في حاجات تندمو عليها من بعد..

اللي باش يزرع فيك الحقد و البغض على ناسك ابعد عليه، ركز في نقاط ايجابية الي في حياتنا، ابعد عالتجاذبات و القشور الكل اتفكر الي كلنا ربنا واحد و هو الي ياخذ بيدنا الكل..
اجبد نفس قوي و ابدا صفحة جديدة في عامك هذا عنوانها :
‘كن شمسًا و لا تكن ظلاًّ ‘ ☀️ 💛

يا دنيا تلزيــــنا (1) I

بقلم:شادي عبيد

الانسان اول ما يجي للدنيا و يحل عينو فيها، يهبطلها يبكي سبحان الله هكا طبع البشري فينا قدام اي حاجه جديده و غريبه نحسو بالخوف كيما اول مره تاكل حاجه حاره، كيما اول مره يهزوك للبحر و انت صغير حاجه غامضه و متعرفهاش شنيه و وين تنجم تهزك، اما بعد تحبها و تتعلق بيها هكاك علاقتنا بدنيا، كيما تستنا عام كامل الصيف بش اطير وحشك من البحر و احنا زادا ديما شغوفين للعيشة و للدنيا، ساعات يجي الموج و يبدا يضرب تسمع صوتو في الشتاء مع الرعد يسيطر عليك الخوف تحس كل شي ماشي و يخياب.. كيما ازماتنا في الحياة و بعد يرجع كل شي لبلاصتو و امور تتصلح و يجي الصيف من جديد.. و هكاكا احنا عايشين بكل بساطة! مره لفوق و مره لوطه…
منعرش علاه خذيت البحر بالذات ك تشبيه.. يمكن خاطرني غامض كيفو مفهمتش روحي.. ولا يفكرني في بلاصه عديت فيها احلى ايامات حياتي.. تونس الخضراء
كي نتكى على سريري يجي قدامي منظر شط بوجعفر و اياماتو بحذا foyer universitaire.. سنين تعدا ما حسيتش كيفاش.. لحظات!
ايامات fac و جوها.. بعد الغربة كيما اي حد نرجع نخدم في بلادي و ننفعها. انا اليوم رجعت لبلادي نيجيريا فلاح و إلا هباط كيما يقولو في تونس في port Lagos, بعد ما قريت هندسة فلاحية!
اليوم انا انسان اخر مش نفسو لي مشا معبي بالطموحات و الاحلام، روحت معبي بوجيعه قاسمتلي ظهري، ضربني حيط و رجعني لاخر، طحت و قمت. منعرش شنوا لازمني نقول، سامحني و لا انا مظلوم و لا ظالم.. ما كنتش قد المحبة هاكي.. منعرش روحي شنوا نحس.. نعرف كان الي حبك في قلبي مازال يدق، سامحني خاطر ما وفيتش بالوعد و ما كنتش رجله و بكلمتي كيما حبيتني نكون، سامحني خاطر محبتي ليك ما كافتنيش بش نحارب.. سامحني خاطرني كحلوش!

ما زلت نتفكر كل شيء صوت الضحكة الخارجة من القلب في وسط cours و في buvette و ريحتها إلي إلتو نشم فيها على كتافي و شعرها و بدنها و خيالها بكلها أما تقعد التفاصيل أكثر حاجة عشقتها لون عينيها العسلي و ندبة الصغيرة في خدها . أيمات تعدات كالمنامة و الله ماني عارف كيفاش و الله لاني عارف لشكون نشكي دايا ، للخلقني ؟ طول نهار و أني نشكي نغزر للقمرى و نقول و يني كحلة الأهداب للات العين إلي علمتني الدارجة التونسية ،بتول مولات العود المسرور و السنجق و الكمون ، بتول عسلية العيون ، بتول و اللسان المغزول و الكلام الموزون .هي كل شيء كانت . بناتني من أول و جديد شكلتني كي حجرت الطين ما نعرفش علاه مكتوب علينا العذاب . يا رب إنت أدرى بالمراد و اللي يقصدك ما يخيب إكتبلي نرى بتول .
خرجت من البيت بعد ما حرم إنوم و شامت الليلة خرجة قعدت تحت الحيط و هزيت عيني للسماء شفت القمرة و النجوم يتعانقوا غزرت إلوطة ريت الحشيش يغنق في بعضو ة وين نقبل نراها حتي كي نغزر لليل و كحولية نتفكر ليلة خرجنا فيها مع بعضنا و كانت لابسة روبة كحلة قصيرة و أني إلي مانيش مستانس بالمنضر هاكا دخلت بعضي و دخلت في صراع داخلي كبير بين يجي و ما يجش هكا و بين قداش و تاتها الروبة..

#شادي_عبيد

الواحد لا عرفها لا منين تبدا لا منين توفى..*2*

طقس مغيم، الشمس تخبات.. نسمه بارده موش مفهومه كي قلوبنا..
اوراق الشجر تميح مع الارياح مش عارفه وين ماشيه..
العينين الكل ذابله سارحه في الفرااغ.. رتابة الحياة موش عارفين وين بش توصلنا..
مفماش حاجه تضيعك و ادوخك، اكثر من انك تعيش بلا معنى.. اكيد عندك طموحات و احلام و برشا حاجات (ماكش فاهمها زادا) ..
لكن الأهم من هذاكا الكل روحك حاضره ولا ؟
تخمامك و غرامك وين.. لمعة عينيك وين.. وين هربت دنيتك المزيانه؟
أقف قدام المرايه و أسأل روحك.. انا اليوم فاش قاعد نعيش بالضبط.. مشكيت الكارطه و عاودت و هي هي..
اقف أسال ڨلبك عالحب، ايه الي سماه حب و يتبع فيه.. قلو،
و علاش يا ڨلبي اخترت ثنيه صعيبه.. اخترت حاجه موش متاعك. ماهيش ليك.. علاه تحبنا نتوجعو و نصدمو على حكايه عارفين نهايتها علاش؟
حبيتو؟ اي حاجه نحبوها في صالحنا ياخي هي.. الحب هذا تعبنا من اول الثنيه.. حيرنا و حرمنا نوم ليالي
حب معندوش بيبان مسيب في الصحراء لا تفهمو لا منين يبدا لا منين يوفا..
عشنا قهرة فقد العزاز علينا قلنا قضاء وقدر.. خسرنا اعز اصحاب قلنا عاشر و فارق و قول مالا راحه..
دفنا احلام بنيناها من الصغره و قلنا رضاية الوالدين ابجل..
خسرنا الي سميناه ‘عشقه’ و تمرمدنا و قلنا حكايه و وفات و متندمش على عمرك لي تعدا متعرفش كيفاش..
و اليوم؟ انا شكون، حياتي شنيه، باش نحب و نتمنا حاجه ليا..
حمد لله الي واقفين على ساقينا..
ماكش مسلم فيه؟ رجعني للدنيا نتنفس.. اما بش يغرقني..
فرحني اما بش يوجعني..
يضحكني و غدوه يبكيني..
يطيرني سابع سما و غدوه يطيحني سابع ارض..
اليوم معايا وغدوه لا..
و نهار ‘لا’ اذاكا.. شنعملو يا ڨلبي؟؟
نهار ‘لا’ كي طحنا اول مره قمنا، زعمه نعاودو نقومو مره اخرى؟
فما حاجه وحده تصبرنا.. صوتنا الدخلاني.. حتى كان صوت خافت و بالسيف يتسمع..
اما انا صوت هكا نصدقو و نآمن بيه.. صوت الي يقلك راك تنجم، باش يجي نهار و تعرف بلاصتك وين بالرسمي.. روحك الضايعه باش ترجعلك..
صوت الي يقلك راك تستحق ما خير، الصوت الي يمسحلك دمعتك بعد كل غصره، الصوت الي عايش ديما فينا اما احنا منحبوش نسمعوه.. الصوت هكا بالذات اسمعوو و آمن بيه.